AkureyrarAkademían 15 ára
18. október 2021 | kl. 12:37
Félag sjálfstætt starfandi fræðimanna á Norðurlandi var stofnað árið 2006 og átta árum síðar tók AkureyrarAkademían við rekstri og starfsemi þess og í ár fögnum við 15 ára starfsafmæli.
Hlutverk AkureyrarAkademíunnar, eins og forverans, er að bjóða háskólanemum og þeim sem sinna fræði- og ritstörfum upp á aðstöðu til að vinna að hugðarefnum sínum með því að starfrækja fræða- og menningarsetur hér í bænum og að skapa brú milli fræða og samfélags með miðlun og samstarfi við almenning, fyrirtæki, stofnanir og opinbera aðila.
Innan veggja Akademíunnar fer fram mjög öflugt og fjölbreytt fræðastarf. Góður andi er í hópnum og allir sem vilja nýta sér aðstöðuna eru velkomnir. Starfsaðstöðunni fylgja húsgögn, nettenging, aðgangur að prentara og sameiginlegri aðstöðu eins og fundarherbergi og eldhúsaðstöðu.
Akademían kappkostar að efla tengslin við aðrar systurstofnanir eins og ReykjavíkurAkademíuna. Einnig erum við með formlegt samstarf við Háskólann á Akureyri og fyrr á þessu ári var gerður samstarfssamningur við Akureyrarbæ sem felur í sér að bjóða einstaklingum sem vinna að þróun að nýsköpunar- og frumkvöðlaverkefna upp á vinnuaðstöðu í húsnæði AkAk sem Akureyrarbær greiðir fyrir.
Nánar er hægt að kynna sér starfsemina á heimasíðu AkAk - www.akak.is
Sigurgeir Guðjónsson er ritari stjórnar AkureyrarAkademíunnar.